2.875 pertsona bildu zituen Kultura Live Zirkuituaren lehendabiziko edizioak

2017ko maiatzean Kultura Live Zirkuitua sortu zuten Kultura Live elkartea osatzen duten aretoek. Nazioarteko zein bertako hainbat musika talde eta bakarlarik parte hartu zuten bertan: Wovenhand, Cracker, PILT, Anestesia, Zen Garden, Bombino, etab.

Guztira 2.875 pertsona batu ziren Kultura Live Zirkuituaren lehendabiziko edizioan. Horietako 714 Gipuzkoan bildu ziren, 221 Araban, 913 Bizkaian, 514 Nafarroan eta 513 Lapurdin.

Proiektu honi esker kalitatezko kontzertu zirkuitu dinamikoa bultzatu nahi dugu, zuzeneko musikak bizi duen egoeraren erradiografia egin, eta musika aretoak aurkitzen diren hirietako, herrietako eta auzoetako ekonomian duten eragina nabarmendu.

Lehendabiziko edizio honen balio erantsia Kultura Live Zirkuituak hainbat aretori programazio ausartak egiteko aukera eskaintzean egon da.

The Dictators NYC, Euskal Herrian

The Dictators NYC, rock eta punk-rock eszenako talde garrantzitsuenetakoa, Euskal Herrira itzuliko da Kultura Live elkarteko kide diren hainbat aretotan kontzertuak eskaintzeko: Dabadaba (apirilak 13), Kafe Antzokia (apirilak 21), Hell Dorado (apirilak 22) eta Zentral (apirilak 26).

New Yorken 1973an sortutako taldeak 1975ean argitaratu zuen ‘The Dictators Go Girl Crazy!’ lehendabiziko diskoa. Gaur egun MC5 eta The Stooges bezalako taldeekin batera AEBko punk rock talde garrantzitsuenetakoa da.

Bere ibilbidean zehar hainbat geldialdi, taldekide aldaketa eta eskubide arazoak izan baditu ere 2014an eta 2015an egin zituzten bezalako bira arrakastatsuak egiten jarraitzen dute.

Apirilaren 13tik aurrera ‘Stay with me’ edo ‘Who will save rock and roll’ bezalako klasikoak zuzenean entzuteko aukera berri bat izango dugu Euskal Herrian egingo duten birari esker.

The Dictators NYC, Euskal Herrian:

Apirilak 13 Donostia, Dabadaba

Apirilak 21 Bilbo, Kafe Antzokia

Apirilak 22 Gasteiz, Hell Dorado

Apirilak 26 Iruñea, Zentral

Beltza Weekend jaialdiak soul eta R&B onenaz beteko du Iruñea

Musika beltza ardatz izanen duen Beltza Weekend jaialdiaren lehen edizioa heldu den irailaren 28, 29 eta 30ean eginen da Iruñean. Estreinako hitzordu honetan soul eta rhythm&blues estiloetan oinarritutako kontzertu sorta dotore eta askotarikoa izanen dugu gozagai eta musika beltzeko disko jartzailerik onenak ekarriko ditugu hirira. Zuzeneko emanaldiak Zentral aretoan izanen dira eta egitaraua nazioarteko taldeekin osatuko da. Bien bitartean, disko jartzaileen saioak Alde Zaharreko hainbat tabernatan eginen dira. Beltza Weekend irauteko asmoarekin jaio da. Aurki kartela osatuko duten lehen taldeak jakinaraziko ditugu.

Musika beltzean espezializatutako Gautxoriak Soul Club eta Shakin’ Brothers kolektibo iruindarrek indarrak batu dituzte Beltza Weekend jaialdia sortzeko Zentral aretoarekin elkarlanean. Helburua hauxe: Musika eta kultura beltzaren soinu-oihal eta espresiobide zenbait Iruñera asteburu luze batez ekartzea (hortik jaialdiaren izena): Soul eta R&B-etik (funk eta bluesa zaku zabal honetan sartuko ditugu) ska eta rocksteady jamaikarreraino, rock and roll beltza bazter utzi gabe. Eta, noski, jazza bere alderdi dantzagarrienean, alegia, klub eta organ-groove zaporedun jazza. Edonola ere, jaialdia aipatutako estiloen jatorriari so jaio da, hau da, joan sen mendeko 50, 60 eta 70etako hamarkadei begira, nahiz eta ez duen, inondik inora, hitzordu “revival”-zalea izateko inongo asmorik.

Kontzertuen egitaraua, aurki jakinaraziko duguna, Zentral aretoarekin elkarlanean osatu da. Izan ere, Zentral izanen da zuzeneko emanaldien epizentroa. Halaber, asteburu osoan zehar –ostegunetik larunbatera– hainbat jai eta saio egingo dira musika beltzeko disko-aukeratzaile onenen eskutik. Horien artean, nabarmentzekoak izanen dira jaialdiaren beste bi egoitzatan eginen direnak: La Urbana eta Nebula tabernetan, hain zuzen ere, Zentralen bertan eginen den saio berezia ahaztu gabe. Eta adi, izan ere larunbatean eguerditik hasita iluntzera arte musika egonen baita: hiriko hainbat txokotan aldi berean eginen den alldayer-a. Saio guztiak biniloarekin eginen dira.Aurki itxitako lehen taldeen izenak jakinaraziko dizkizuegu eta detaile gehiago emanen ditugu festei, disko jartzaileen saioei eta prestatzen ari garen jarduera paraleloei buruz.

Zipren ospatuko den STAMP PROJECT mintegian parte hartuko du Plateruenak

Plateruena

Durangoko Plateruenak, Kultura Live elkarteko bazkidea eta aldi berean Europako Live DMA elkarteko bazkidea, Europako Musika Kontseiluak bultzatutako STAMP PROJECT ekimenean parte hartuko du.

Europako herrialde ezberdinetan musikaren sektorean formakuntza profesionala eta joera enpresarialak bultzatzeko lanabesak sortzeko proiektua da STAMP PROJECT.

Zipreko Nikosia hirian apirilaren 28an eta 29an burutuko den mintegian Live DMA elkartearen ordezkaritza lanak egingo dituzte Plateruenak (Kultura Live) eta VNPF elkarteak (Holandako musika areto eta jaialdien elkartea).

Ekintzailetza, jaialdi eta ekitaldien antolakuntza, audientzien garapena, integrazio soziala, sare lanak eta nazioarteko kooperazioa izango dira jorratuko diren gai nagusiak.

Parte hartzaileek Europa mailako kontaktuak landu, kontaktu berriak sortu, giza garapenean aurrera egin eta herramienta digital berriak ezagutuko dituzte.

Kultura Live 2015an bilakatu zen Live DMA Europako Musika Aretoen eta Musika Jaialdien elkartearen bazkide. Etxepare Institutuarekin elkarlanean.

Hemen da Musik On, Musika Aretoen Asteburua

John Paul Keith

Datorren asteburuan, azaroaren 24tik 27ra, ‘Musik On, Musika Aretoen Asteburua’ ospatuko dute Kultura Live elkarteko aretoek.

Ekimen honek musika aretoen lanak musikaren sektorean duen eragina azpimarratzea du helburu. Horretarako asteburu bakar batean musika aretoek eskaintzen dituzten kalitatezko kontzertuen kopurua eta gizartean zuzeneko musikak duen garrantzia nabarmendu nahi dira.

Hauek dira ekimen honetan parte hartuko duten aretoak: Kafe Antzokia, Santana 27 / Fever, Hell Dorado, Plateruena, Bermeoko Kafe Antzokia, Beikozini, Doka, Le Bukowski, Dabadaba, Sala Totem, Zentral Kafe Teatro, Tunk!, Atabal, Sala Noboo, Bilbaína Jazz Club y Azkena Bilbao.

28 Mercat de Música Viva de Vic

Irailaren 14tik 18ra Catalunyako Vic hirian Mercat de Música Viva azokaren 28. edizioa ospatu zen.

Kultura Live bertan izan ginen eta irailaren 14an ospatu zen hasiera ekitaldian parte hartu genuen. Bertan, ASACC elkarteak 15 urteko ibilbidea ospatzen duen ikus-entzunezko lana aurkeztu zuen. Horretaz gain Carles Rodríguez argazkilariaren ‘Backstage Curtcircuit’ erakusketa ere ikusteko aukera izan genuen.

Ester Jiménez Morenok eta Bad Gyal-ek gidatutako ‘Los millenials: ¿nacen o se hacen?’ hitzaldian gaur egun gazteengana heltzeko marketing estrategiak ezagutu genituen.

Hainbat instituzio eta elkarteetako kideekin topaketak izateaz gain irailaren 16an ‘La Seguridad Social de los Músicos en salas de pequeño formato’ izenburuko lan mahaian parte hartu genuen.

Azkenik, EH Sona 2016 jaialdiaren aurkezpen ekitaldian izan ginen. Baita ondoren Amorantek eskaini zuen kontzertuan ere.

Vic-en ikasitakoak egunerokoan aurrera egiten lagunduko gaitu eta ekimen berriak sortzeko aukera eskainiko digu.

Argazkia: PERE MASRAMON

Jarri zaitez gurekin kontatuan